بدايتي بعالم الرياضه كانت بظروف مؤلمه 💔

حصلت لي ظروف جدا صعبه وهيا خروج وطرد امي من البيت بعد انفصالها من ابويا ، ابويا كان قاسي ومن النوع الشكاك جدا ،  كان يشك بأمي دايما ، بين وقت وقت يرمي عليها اتهامات غير حقيقيه ، بيتنا كان كله صراخ وتوتر وقلق ، لدرجة تمنيت اني أعيش وحدي أنا وامي بس ، ولا ابغى وجوده ، وكانت الحياه مؤلمه لها ولي أنا كبنتها ، والشك أنا اعتبره مرض ومميت ببطء ، قرر ينفصل عنها ويطردها من البيت ، واضطرت امي تبحث عن بيت ، مع العلم ان ماعندها أهل أبدا بنفس المدينه ، لكن كانت موظفه بمدرسه بالمقصف فاستأذنت من صاحبة المكان ان تنام بالمدرسه حتى تدبر أمورها ، كانت تنام بنفس المقصف على الأرض ، تفرش فرشتها وتنام بالمكان الضيق ، بعد ماطلعت امي من البيت وبعد الطرد ، انهرت نفسيا ، صرت ابكي زي المجنونه وصرت أدور بالغرفه مره الصاله ومره اشم ملابسها ، ومره اروح الغرفه وارجع ادور بالصاله مادري إذا هذه نوبة هلع اللي يسمونها صراحه مادري بس كذا كانت ردة فعلي ، لان امي وحيده ماعندها سند أبدددااا ، حتى أهلها خارج السعوديه ، وكنت عارفه هالشي ، ان محد يساعدها او حتى احد يفتح لها بيته ،  بكيت وصرخت وانهرت لين دخت ونمت .. 

بعد ما الله دبر أمور امي وأحوالها الحمد الله ، وصارت تجينا زيارات بالقوه كمان ، لان ابويا كان مايسمح انها تجي إلا فترة قصيره فقط ، وفكرة ان امي ماهي معايا بنفس البيت وفكرة انها تنام بمقصف المدرسه ، كانت لحالها توجعني جدا جدا ، أنا من هنا انتكست ، الاكل صرت أكله عشان أعيش بس وعشان ماأطيح عليهم بالأرض ، كان وزني كبير حول 80 ، الاكل ماستطعمه مو مشهي ، نفسيتي تدمرت ، كنت عايشه مع امي طول عمري إلى عمر 22 ، وفجاه خرجت من حياتي ، لا وحتى خرجت بدون أغراضها الشخصيه ملابسها او حتى لو بطانيه تغطي نفسها من البرد ، انطردت مثل ماهي فقط أخذت عبايتها ،  ماكان سهل أبدا ، عشت مع ابويا ، وبغرفه أنا وأختي الصغيره ، وكان هدا بداية التغيير . 

يمكن كلامي مو مرتب ، بس لم استرجعت كل الذكريات ، حزنت على نفسي ، مدري كيف صملت وعديتها. 

المهم .. 

بداية التغيير من كلام الناس ، كأنو يقولولي وهم مفجوعين نحفانه ! كيف ! خلاص نحفتي بشكل مبالغ انتبهي على نفسك ، صراحه مادري كيف نحفت بالنحف المفجع ذا على قولتهم كنت هيكل عظمي ، ومادري كم وزني صار . ماكنت مباليه طززز ، لان نفسيتي متدمره ، وماعرف هل نحفت سريع او بالشهور ماعرف ماكنت مركزه ، بس لم شفت نفسي بالمرايا وشفت يدي كيف نحيفه مرا من فوق وكأني من المجاعه. أعجبني صراحه ، أعجبني النحف ، ماكذب كنت مبسوطه ، صح وجهي كان ذبلان وميت ، بس عادي اهم شي نحيفه ، ومبسوطه مرا كيف نحفت بدون ماحس ، لان لم كان وزني عالي جدا كان ابويا يتنمر عليا قدام احد " شف شف كيف وزنها عالي ، تحب الاكل ، " ويضحك عليا ، وقتها كانت كرشتي بارزه فوق الملابس .  

ولم نحفت بالشكل المفجع دا خاف عليا اني لا أكون صرت مريضه 😂 طيب يا ابويا بالعكس افرح مو كنت تضحك عليا اني دبه ! 

وصرت لم أكون معاه بطاوله وحده. يعطيني الاكل دا والصحن دا كلي كلي ، شكرا يا ابويا بس فات الأوان خلاص. 

وعشان أعجبني النحف المجاعي دا. قررت أحافظ عليه ، كان عندنا بالبيت سير treadmill مرمي محد داري عنه ، والله وركبته ومشيت عليه ، ماكانت عندي جزمه رياضيه. كنت امشي بالشراب فقط ، ومرات بدون شراب ، حفيانه . وأشغل السماعه بأذني ، نص ساعه وأخلص. 

وأيام زمان ماكان في سناب شات او تيك توك ، كنت على تويتر صرت ابحث واقرا ، واشوف ناس زيي بعالم الرياضه والدايت ، وأول دايت مسكته دايت المرونه اللي الآن مستمره عليه. مادخلت ولا جربت اي نوع دايت ، وصرت أشوف ناس ترشح مقاطع رياضيه ، وانا وقتها كنت طفشت من السير أبغا شي جديد ، وأول مقطع اتمرنت عليه بالبيت كان مقطع شون تي 25t  مادري مين يذكرها 😂 ، صراحه كانت من اقدم المقاطع ختمت كل الجدول ، و ليومك ذا أعيد واحد من المقاطع ، صراحه المقاطع نقلتني نقله كبيره بعالم الرياضه وشد الجسم ، وبرضو كنت وقتها اتمرن بدون جزمه رياضيه بشراب فقط ، ومرات بدون شراب ، والله يا ان كانت تجيني تقرحات وجروح على رجولي لان كنت اتمرن على السجاده ، ومع الاحتكاك صارت رجولي تشققات كدا وجلد معفط ، وقتها قررت اجيب جزمه " كانت مادتي صعبه انتظرت العيد عشان اخذ العيديه " 

واشتريت أنا وأختي الجزمه الرياضيه ، للعلم اختي كانت معايا بعالم الرياضه مادري كيف دخلت معايا ، بس فجاه صرنا مع بعض ، والرياضه احبها احبها كانت تشيل الضغط النفسي اللي فيني ، كانّها خففت نفسيتي ، لان صار تركيزي وأهدافي عليه وانشغلت عن الاكتئاب ، إلى ان تطورت واتعمقت بعالم الرياضه ، صرت أتابع ناس مثلي ، ودخلت بعالم الحديد ، دخلت بالتضخيم والتنشيف ، دخلت بحساب السعرات والموال حقها إلى ماوصلت عليه الآن. 

شكرا يانفسي .. 

شكرا يا نفسي لأنك سلكتي الطريق الصح ، كله بفضل الله الذي كان بجانبي وأرشدني إلى الطريق الصحيح ، صملتي وتعبتي واتحملتي الاذى ، صح في شرخ وجرح ، لكن قاعده أغطيه ، وأكمل طريقي .